„Maðurinn haldi sig til hlés á þessum helga stað“

„Tillagan snýst um lágmarks rask í gjánni og hefur það sjónarmið að maðurinn skuli halda sig til hlés á þessum helgum stað,“ segir í tillögu Studio Granda og verkfræðistofunnar Eflu sem fékk fyrstu verðlaun í samkeppni Þingvallanefndar um gönguleið niður í Almannagjá eftir að sprunga opnaðist þar óvænt í fyrra.

„Framkvæmdin er hugsuð eins einföld og hægt er þar sem tíminn er naumur og áhersla er lögð á að auðvelt verði fjarlægja mannvirkið án þess að nokkur ummerki sjáist,“ segja höfundar tillögunnar sem fá 400 þúsund krónur í verðlaun. Átta tillögur bárust.

Gólf brúarinnar verður úr sitkagreni úr Skorradal og á að hvíla á langbitum úr rekaviði og laga sig að sprungunni. Handriðið verður úr ryðguðum efnispípum sem net úr basalttrefjum verður strengt á milli.

„Stígurinn liggur þétt við klappir og annað undirlag í sprungunni og lagar sig að nokkru leyti að legu hennar án þess þó að þekja hana eða draga athygli að henni um of,“ segir í umsögn dómnefndar sem kveður verðlaunatillöguna áreynslulausa.

- gar