Þjóðin fái að kjósa um stjórnarskrána

Formaður stjórnskipunar- og eftirlitsnefndar vill að drög að nýrri stjórnarskrá verði borin undir þjóðina í sumar. Málið verður að klárast í mars eigi að kjósa samhliða forsetakosningum. Ekki í samræmi við yfirlýsingar varaformanna.

Valgerður Bjarnadóttir, formaður stjórnskipunar- og eftirlitsnefndar Alþingis, leggur til á fundi nefndarinnar í dag að drög að nýrri stjórnarskrá verði borin í heilu lagi undir þjóðina samhliða forsetakosningum í sumar. Aukreitis verði nokkrar spurningar um ákveðna efnisþætti.

„Ég mun leggja það til að frumvarpið verði í heild sinni lagt fyrir þjóðina og svo nokkrar spurningar með. Þetta er það sem ég mun leggja fram á morgun [í dag]. Ég vonast til að við náum að klára málið fyrir lok mars.“

Mikilvægt er að það náist þar sem boða verður til þjóðaratkvæðagreiðslu með að minnsta kosti þriggja mánaða fyrirvara. Dragist málið næst því ekki að kjósa samhliða forsetakosningum í júní.

Álfheiður Ingadóttir, fyrsti varaformaður nefndarinnar, og Róbert Marshall, annar varaformaður, sögðu í Fréttablaðinu á föstudag að unnið væri eftir þeim línum að fá viðhorf þjóðarinnar til mikilvægustu greina stjórnarskrárinnar.

„Eftir því sem vinnunni hefur undið fram í nefndinni hefur mér sýnst að það borgi sig að leggja fram nokkrar spurningar út úr skjalinu þar sem þjóðin er beðin að taka afstöðu til forsetaembættisins, ríkis og kirkju, auðlindaákvæðis og svo framvegis,“ sagði Róbert þá.

Gísli Tryggvason, sem sat í stjórnlagaráði, segist treysta því að stjórnarskrárfrumvarpið verði borið undir þjóðina í heild sinni. Það sé yfirlýstur vilji forsætisráðherra og meirihluta allsherjarnefndar Alþingis. Gísli segir þjóðina vera mikilvægasta aðilann að málinu og því mikilvægt að hún fái að segja skoðun sína.

Gísli segir marga kosti í stöðunni og kannski sé fullmikið að þjóðin greiði atkvæði um hverja einustu grein frumvarpsins. Mögulegt væri að greiða atkvæði um hvern kafla. „Hvor leiðin fyrir sig er vel framkvæmanleg því þetta er bara ráðgefandi atkvæðagreiðsla,“ segir Gísli. Auðvelt sé því að vinna úr niðurstöðum hennar.



„Önnur leið væri að í stað þess að greiða atkvæði um einstaka grein eða kafla þá séu greidd atkvæði um þau atriði sem Alþingi og stjórnlagaráð eru ósammála um.“

Til að svo megi verði segir Gísli mikilvægt að stjórnlagaráð komi aftur að málinu og vinni með Alþingi að undirbúningi atkvæðagreiðslunnar, eins og boðið var upp á í skilabréfi ráðsins.

kolbeinn@frettabladid.is