Sammála um annað en ESB

Stofnfundur nýrrar breiðfylkingar um framboð til næstu alþingiskosninga var haldinn í gær. Að fylkingunni standa auk annarra þingmenn Hreyfingarinnar, Borgarahreyfingin, Frjálslyndi flokkurinn og ýmis grasrótarsamtök.

„Það er vilji til þess hjá þessum hópum að vinna að þessu, en það er opið fyrir að fleiri bætist í hópinn og ekki víst að allir skili sér í endahöfn,“ segir Margrét Tryggvadóttir, þingmaður Hreyfingarinnar.

Sameiginlegt framboð hefur gengið undir vinnuheitinu Breiðfylkingin, en óskað var eftir hugmyndum að heiti á fundinum í gær.

Margrét segir mikinn samhljóm hafa verið um flest atriði svokallaðrar kjarnastefnu fylkingarinnar, en nú taki við málefnavinna fyrir framhaldsaðalfund sem til standi að halda eftir mánuð. „Það var alger samstaða um mál eins og afnám verðtryggingar og leiðréttingu húsnæðislána,“ segir Margrét. Hún segir fundarmenn þó ekki hafa verið sammála um hvernig fara eigi með aðildarviðræðurnar við Evrópusambandið. Fyrir fundinum lá tillaga um að ljúka viðræðum og leyfa þjóðinni að ákveða framhaldið í þjóðaratkvæðagreiðslu. Ekki náðist samstaða um það, þar sem sumir vildu hætta viðræðum, og aðrir vildu kjósa um hvort halda ætti viðræðum áfram.- bj