Flestir fengu inni í skóla að eigin vali

Samkvæmt nýaflögðu innritunarkerfi framhaldsskóla fengu 98 prósent nemenda inni í öðrum hvorum þeirra skóla sem þeir völdu. Stefnt er að því að kynna nýtt bráðabirgðafyrirkomulag í næsta mánuði.

MenntamálNámsráðgjafar hafa orðið varir við óöryggi meðal nemenda í efstu bekkjum grunnskóla og foreldra þeirra vegna óvissu um hvernig staðið verði að innritun í framhaldsskóla næsta haust.

Samkvæmt heimildum blaðsins verður málið tekið upp á vettvangi Félags náms- og starfsráðgjafa eftir að menntamálaráðuneytið kynnir í byrjun næsta mánaðar bráðabirgðafyrirkomulag við innritun.

Fyrirkomulag sem hefur verið við lýði síðustu ár var aflagt í janúarbyrjun eftir nýtt álit umboðsmanns Alþingis. Í því kom fram að lagastoð hafi skort fyrir hverfaskiptingu nemenda í framhaldsskóla á höfuðborgarsvæðinu.

Breytt fyrirkomulag innritunar sem tekið var í notkun árið 2010 kvað á um að ákveðið hlutfall plássa í hverjum skóla skyldi tekið frá fyrir nemendur úr hverfi skólans. Val nemenda fór þannig fram að þeir tiltóku tvo skóla, þann sem þeir vildu helst sækja í fyrsta vali og svo næstbesta kost í öðru vali.

Samkvæmt gögnum frá menntamálaráðuneytinu virðist innritun samkvæmt nýja kerfinu, sem nú hefur verið aflagt, hafa verið skilvirkari en fyrri aðferðir og mun færri nemendur staðið uppi án skóla við lok innritunar. Árið 2009 urðu nokkur vandræði við innritun þegar gildi tóku lög um fræðsluskyldu allt til 18 ára aldurs. Það ár voru 342 nemendur án skóla að vali loknu og þurftu sérstaka íhlutun ráðuneytisins. Haustið 2010 var þessi fjöldi kominn niður í 209 og í fyrrahaust þurftu einungis 80 nemendur sérstaka íhlutun.

Samkvæmt tölum ráðuneytisins fengu síðasta haust rúmlega 98 prósent nemenda skólavist í öðrum hvorum þeim skóla sem þeir völdu og 87 prósent fengu inni í þeim skóla sem þeir vildu helst.

Álit umboðsmanns Alþingis kemur í kjölfar umkvartana til hans frá tveimur nemendur í 10. bekk grunnskóla. Annar taldi innritunarreglurnar fela í sér mismunun á grundvelli búsetu og brjóta í bága við jafnræðisreglur.

Í kvörtuninni var bent á að framhaldsskólar væru ekki allir sambærilegir og að í þeim væri ekki sama námsframboð. Hinn nemandinn taldi innritunarreglurnar ekki byggjast á málefnalegum sjónarmiðum. „Með þeim væri réttur nemenda til valfrelsis skertur og þeim mismunað á ómálefnalegum forsendum,“ segir í áliti umboðsmanns.olikr@frettabladid.is