Meirihluti vill staðgöngumæðrun

Velferðarmál Alþingi samþykkti í gær þingsályktunartillögu um staðgöngumæðrun með 33 atkvæðum gegn þrettán. Fjórir þingmenn sátu hjá og aðrir voru fjarverandi.

Þingsályktunartillagan sem samþykkt var í gær felur í sér að velferðarráðherra skipi starfshóp til þess að undirbúa frumvarp til laga sem heimilar staðgöngumæðrun í velgjörðarskyni. Frumvarpið á að leggja fram „svo fljótt sem verða má“. Ragnheiður Elín Árnadóttir var fyrsti flutningsmaður en 22 aðrir þingmenn úr öllum flokkum nema Hreyfingunni voru meðflutningsmenn. Árni Johnsen var einn Sjálfstæðismanna á móti tillögunni.

Jónína Rós Guðmundsdóttir, þingmaður Samfylkingarinnar, lagði áherslu á að ekki væri verið að samþykkja staðgöngumæðrun. Sigríður Ingibjörg Ingadóttir, samflokksmaður hennar, sagði hins vegar að meirihluti þingsins fylgdi nú Sjálfstæðisflokknum í því að markaðsvæða meðgönguna.

Fjórir þingmenn lögðu fram breytingatillögu sem fól í sér að starfshópurinn myndi skoða álitamál um staðgöngumæðrun, og myndi í þeirri vinnu hafa hliðsjón af niðurstöðum annars vinnuhóps sem skilaði áfangaskýrslu um álitaefni árið 2010. Sá hópur lagðist gegn því að staðgöngumæðrun yrði samþykkt. Breytingatillagan var felld en átján þingmenn vildu samþykkja hana. - þeb