Gefa lítið fyrir endurskoðunina

sjávarútvegurHafrannsóknastofnun telur ekki ástæðu til að endurskoða tillögurnar um aflamark í ýsu fyrir fiskveiðiárið 2011/2012. Landssamband smábátaeigenda (LS) gefur lítið fyrir vinnubrögð Hafrannsóknastofnunar.

Sjávarútvegs- og landbúnaðarráðuneytið fór þess á leit við Hafrannsóknastofnun í lok árs 2011 að skoðuð yrði á nýjan leik ráðgjöf um aflamark í ýsu. Tilefnið var þrýstingur frá LS sem halda því fram að mun meira sé af ýsu núna en í fyrra og þá sérstaklega á grunnslóð.

Hafrannsóknastofnun hefur nú svarað ráðuneytinu með fyrrnefndri niðurstöðu. Í bréfinu er ítrekað að ráðgjöfin taki tillit til þess að stofn ýsu fer hratt minnkandi vegna þess að stórir árgangar eru að hverfa út úr veiðinni. Hætta sé á að hrygningarstofn ýsu fari niður í sögulegt lágmark.

Þetta gengur þvert á upplifun smábátamanna sem gefa lítið fyrir niðurstöðu Hafró eins og má lesa á heimasíðu sambandsins. „Við lestur bréfsins er nokkuð ljóst að stofnunin hefur ekki kafað djúpt í grunn ráðgjafarinnar hvað þá að leita eftir þróun á aflabrögðum það sem af er fiskveiðiárinu,“ segja smábátamenn.- shá