Segir útilokað að ljúka störfum í júní

Útilokað er að nefnd sem móta á þjóðaröryggisstefnu Íslands ljúki störfum í júní eins og Alþingi samþykkti í september síðastliðnum þar sem enn er ekki búið að skipa nefndina. Þetta segir Ragnheiður Elín Árnadóttir, tilvonandi fulltrúi Sjálfstæðisflokksins í nefndinni.

Alþingi samþykkti 16. september tillögu Össurar Skarphéðinssonar utanríkisráðherra um að hann fengi umboð til að skipa nefndina. Engin þjóðaröryggisstefna hefur verið til hér á landi, og hefur þörfin fyrir hana aukist frá því að bandaríska varnarliðið hvarf af landi brott árið 2006.

Samkvæmt ákvörðun Alþingis eiga Samfylkingin, Vinstri græn, Sjálfstæðisflokkur og Framsóknarflokkur að skipa tvo þingmenn í nefndina og Hreyfingin einn. Formaður nefndarinnar verður skipaður af utanríkisráðherra.

Ragnheiður Elín segir að Sjálfstæðisflokkurinn hafi tilnefnt sína fulltrúa seint á síðasta ári, en síðan hafi ekkert gerst, og nefndin ekki verið skipuð af ráðherra.

Vegna þessa segir hún fráleitt að ætla sér að ljúka við gerð þjóðaröryggisstefnu fyrir lok júní, eins og samþykkt var á Alþingi. Útilokað sé að vinna undir slíkri tímapressu, enda lögð áhersla á að ná samstöðu um stefnuna.

Fjallað verður um fjölbreytt mál í nefndinni, svo sem ógnir af völdum hryðjuverka, skipulagðrar glæpastarfsemi, náttúruhamfara, stórslysa og netárása. Líklegt er að mestur styr muni standa um stefnu Íslands þegar kemur að hefðbundnum hernaðarvörnum.

Ekki náðist í Össur Skarphéðinsson utanríkisráðherra vegna málsins í gær. - bj