Freista fíkniefnahunds með fé úr sveitarsjóði

Borgarbyggð styrkir lögregluna um 300 þúsund krónur svo fíkniefnahundurinn Nökkvi þjóni áfram í umdæminu. Lögreglan segist þurfa að skera niður og að 1,5 milljón króna á ári myndu sparast ef Nökkvi væri leystur undan störfum.

Lögregluembættið í Borgarfirði og Dölum á nú kost á þrjú hundruð þúsund króna styrk frá Borgarbyggð til að halda fíkniefnahundinum Nökkva.

„Okkur þykir mjög vænt um að fá stuðning sem gerir okkur kannski kleift að halda Nökkva,“ segir Theodór Þórðarson yfirlögregluþjónn, sem kveður fjármálin sífellda glímu. „Við skiluðum einum af fjórum bílum í apríl til að létta róðurinn og svo þurftum við að segja upp einum starfsmanni af níu um áramótin.“

Að sögn Theodórs er nú verið að benda sveitarfélögunum í umdæminu á að ein og hálf milljón króna myndi sparast ef Nökkvi yrði leystur undan skyldum sínum við embættið. Enn sem komið er hefur aðeins Borgarbyggð brugðist við kallinu en Theodór vonast eftir stuðningi fleiri sveitarfélaga.

Labradorhundurinn Nökkvi er arftaki Tíra, hunds af tegundinni Springer Spaniel, sem hafði þefað uppi fíkniefni á Vesturlandi frá árinu 2003 áður en hann var felldur. Theodór segir hundana hafa margsannað gildi sitt. Þeir hafi meðal annars verið við skyldustörf utan umdæmisins um borð í skipum og á flugstöðvum. Þeir geti einnig leitað að fólki og séu á allan hátt mikilvægir. Hann bendir á að fleiri ökumenn séu stöðvaðir í umdæminu undir áhrifum fíkniefna en ölvaðir. „Við notum hundana líka mikið í forvarnafræðslu í skólum, á fundum með foreldrum og á vinnustöðum og hjá klúbbum,“ segir hann.

Þó að fjármálin séu í eilífri endurskoðun segir Theodór lögregluliðið standa sig vel.

„Núna á laugardaginn stöðvuðu strákarnir einn bíl á norðurleið og settu í þrjú hundruð grömm af heimaræktuðu kannabis,“ upplýsir yfirlögregluþjóninn.

Í samþykkt bæjarstjórnar Borgarbyggðar vegna áðurnefndrar styrkveitingar segir að það kæmi sér mjög illa ef lögreglan úr umdæminu þyrfti að skila fíkniefnahundinum, ekki síst vegna forvarnargildis slíkra hunda. Sveitarstjórnin kveðst vilja leggja fjárstyrkinn sem lóð á vogarskálarnar. Jafnframt segir hún ólíðandi að niðurskurður á fjárveitingum til lögregluembættisins leiði til fækkunar lögregluþjóna.

„Því skorar sveitarstjórn á innanríkisráðuneytið að endurskoða ákvörðun um lækkun á fjárveitingum til embættisins,“ segir sveitarstjórnin.

- gar