Skýrsla um Vaðlaheiðargöng falin á Háskólavef

Skýrsla um Vaðlaheiðargöng sem Hagfræðistofnun Háskóla Íslands vann fyrir samgönguráðuneytið árið 2010 var aldrei birt opinberlega af hálfu ráðuneytisins. Þetta kom fram í Morgunblaðinu í gær.

Samkvæmt skýrslu Hagfræðistofnunar þurfa veggjöld í fyrirhuguð Vaðlaheiðargöng að vera um tvöfalt hærri en gert er ráð fyrir í núverandi áætlunum félags um göngin. Þá felist áhætta í því að vegfarendur muni áfram geta ekið Víkurskarð í stað þess að greiða í göngin sem myndi þó spara þeim um sextán kílómetra akstur.

Samgönguráðherra á árinu 2010 var Kristján L. Möller, alþingismaður Samfylkingar úr Norðausturkjördæmi. Kristján er stjórnarmaður í Vaðlaheiðargöngum ehf. Ekki náðist í Kristján í gær.

„Það gleymdist að birta skýrsluna hjá okkur en hún var birt mjög fljótlega á vef Hagfræðistofnunar. Það þarf að leita og gramsa svolítið til að sjá hana þar,“ segir Jóhannes Tómasson, upplýsingafulltrúi innanríkisráðuneytisins sem nú fer með samgöngumál.

Jóhannes segir að þótt skýrslan hafi ekki verið birt opinberlega af hálfu samgönguráðuneytisins, frekar en ýmis önnur gögn í málinu, hafi hún verið kynnt í ríkisstjórn og rædd í nefnd um gjaldtöku vegna stórframkvæmda. Skýrslan hefur nú verið sett inn á vef innanríkisráðuneytisins.

Vaðlaheiðargöng eru nú til umfjöllunar í bæði fjárlaganefnd og samgöngunefnd Alþingis. Málið verður á dagskrá samgöngunefndar á mánudagsmorgun. - gar