Vilja útskýringar á útreikningunum

Fulltrúar Sjálfstæðisflokksins í atvinnuveganefnd vilja að útreikningar sjávarútvegs- og landbúnaðarráðuneytisins á áhrifum fyrirhugaðs veiðigjalds verði lagðir fram í nefndinni og útskýrðir. Þá vilja þeir einnig að Huginn Þorsteinsson, aðstoðarmaður ráðherra, verði kallaður á fund nefndarinnar til að útskýra ummæli sem hann viðhafði í aðsendri grein í Fréttablaðinu um niðurstöður endurskoðunarfyrirtækisins Deolitte á áhrifum veiðigjaldsins.

Þeir Jón Gunnarsson og Einar K. Guðfinnsson, fulltrúar Sjálfstæðisflokksins í nefndinni, segja að það sé nauðsynlegt að fá fram þau rök sem liggi hér að baki og hvort ráðuneytið meti þær upplýsingar sem fram koma hjá Deloitte ómarktækar eða ekki.