Voru lykilmenn í gerð talgreinis

lKristinn Halldór Einarsson, Jón Guðnason og Trausti Kristjánsson hlutu viðurkenningar Íslenskrar málnefndar fyrir störf í þágu íslenskrar tungu í ár.

Kristinn Halldór Einarsson, formaður Blindrafélagsins, hlaut viðurkenningu fyrir að hafa frumkvæði að gerð nýs íslensks talgervils, sem félagið kynnti fyrr á árinu. Talgervillinn er hugbúnaður sem breytir texta í tal. Talgervilinn er hægt að nota í tölvum, símum og annars konar tölvustýrðum búnaði. Hann er því ómetanlegt hjálpartæki fyrir blinda og sjónskerta auk þess að vera stórtíðindi fyrir íslenska máltækni og íslenska tungu.

Þá fengu Jón Guðnason, lektor í tölvunarfræði, og Trausti Kristjánsson, aðjunkt við Háskólann í Reykjavík, viðurkenningu fyrir framlag sitt til nýs talgreinis fyrir íslensku. Google kynnti talgreini fyrir íslensku í lok sumars, en hann nemur talað mál og breytir í ritaðan texta. Jón og Trausti voru lykilmenn í því að talgreinirinn varð til á íslensku. - þeb