Aðilar vinnumarkaðarins staðfesta kjarasamninga

Framkvæmdastjóri Samtaka atvinnulífsins telur að mörg fyrirtæki þurfi að beita verðhækkunum og hagræðingu til að eiga fyrir launahækkunum um næstu mánaðamót. Aðilar vinnumarkaðarins staðfestu kjarasamninga í dag þrátt fyrir bullandi óánægju með frammistöðu ríkisstjórnarinnar í atvinnumálum.

Bæði Samtök atvinnulífsins og Alþýðusambandið telja að ríkisstjórnin hafi ekki efnt þau loforð sem voru gefin í yfirlýsingu í tengslum við undirritun kjarasamninga síðasta vor.

Væntingar um hagvöxt og fjárfestingar hafi ekki gengið eftir og þá hefur alþýðusambandið gagnrýnt skattlagningu lífeyrissjóða.

Þrátt fyrir þetta var ákveðið að staðfesta kjarasamninga í dag.

Nokkur félög innan starfsgreinsambandsins vildu segja upp kjarasamningum vegna vanefnda ríkisstjórnarinnar. Formaður sambandsins segir að áfram verði þrýst á stjórnvöld um að efna gefin loforð.

Laun hækka um þrjú og hálft prósent um næstu mánaðamót en óvíst er hvort öll fyrirtæki ráði við hækkun af þessu tagi þar sem forsendur um hagvöxt og fjárfestingar hafa ekki gengið eftir.