Hróp gerð að þingmanni: „Hlustaðu á þjóðina!“

Áhorfanda á pöllum Alþingis var vísað út af öryggisgæslu þingsins eftir að sá sami gerði hróp að þingmanni Sjálfstæðisflokksins, Ólöfu Nordal. Sá hrópaði: „Hlustaðu á þjóðina!“

Ragnheiður Ríkharðsdóttir, sem sat þá í forsetastóli, bað viðkomandi að gefa þingmanninum hljóð. Við því virðist hafa verið orðið.

Samkvæmt upplýsingum frá öryggisgæslu Alþingis er fámennt á pöllum Alþingis, þar sem rætt er um tillögu Bjarna Benediktssonar, formanns Sjálfstæðisflokksins, um að afturkalla ákæru á hendur Geir H. Haarde, fyrrverandi forsætisráðherra.