Of Monsters and Men með bestu plötuna samkvæmt Amazon

Stærsta vefverslun veraldar, Amazon, hefur valið plötuna My Head is an Animal eftir íslensku hljómsveitina Of Monsters and Men sem bestu hljómplötuna það sem af er árinu.

Á meðal þeirra hljómsveita sem eru á listanum eru Gotye með hljómplötuna Making Mirrors, Snow Patrol með Fallen Empires og J.D. McPherson með Signs & Signifiers.

My Head is an Animal er nú á sérstöku tilboðsverði hjá Amazon og kostar platan 3 dollara í stafrænu formi.

Of Monsters and Men hefur notið gríðarlegra vinsælda síðustu misseri. Það var síðan í síðustu viku sem greint var frá því að hljómsveitin muni koma fram í spjallþætti Jays Leno, 29. júní næstkomandi.