Jóhanna kallar eftir sanngirni

Jóhanna Sigurðardóttir segir aðila vinnumarkaðarins ekki sýna ríkisstjórninni sanngirni í umræðu um framtíð kjarasamninga. Það ræðst á morgun hvort kjarasamningar sem gerðu voru snemma á síðasta ári haldi gildi sínu eða hvort farið verði fram á endurskoðun á þeim.

Ríkisvaldið hafi farið í stórkostlegar aðgerðir með aðilum vinnumarkaðarins tengdum kjarasamningum. Aðilar vinnumarkaðarins, einkum Samtök atvinnulífsins, hafa kallað eftir aukinni fjárfestingu í atvinnulífinu. Jóhanna sagði á þingfundi í dag að vel hefði gengið með ýmsar opinberar framkvæmdir og útlit væri fyrir verkefni fyrir um 75 milljarða á næstunni. Ekki hefði gengið eins vel með mörg verkefni á almenna markaðnum. „Við erum öll af vilja gerð til að þetta nái fram, en til þess þarf að vera sanngirni á báða bóga, sem er ekki," sagði Jóhanna.

Birgir Ármannsson þingmaður Sjálfstæðisflokksins sagði að við umræðuna um ástand á vinnumarkaði kæmi alltaf sama svarið frá ríkisstjórninni. „Við erum vön því hér í stjórnarandstöðunni að vera sökuð um það að sjá allt í tómu svartnætti og vera að misskilja allt. Það er farið svipuðum orðum um samtöku atvinnurekenda," sagði Birgir, en benti á að félög launþega í landinu sæju heldur ekki efndir ríkisstjórnarinnar á þeim loforðum sem gefin hefðu verið.