Barnaníðingur í átta ára fangelsi

Hæstiréttur Íslands þyngdi í dag dóm yfir kynferðisbrotamanni í Vestmannaeyjum um eitt ár. Hæstiréttur komst að þeirri niðurstöðu að maðurinn sem var fundinn sekur um kynferðisbrot gegn þremur stúlkum á aldrinum sjö til ellefu ára skyldi sæta átta ára fangelsi vegna brotsins. Héraðsdómur Suðurlands hafði áður komist að þeirri niðurstöðu að maðurinn skyldi sæta sjö ára fangelsi fyrir dóminn.

Maðurinn er einnig sakfelldur fyrir að hafa haft rúmlega átta þúsund barnaklámsmyndir í tölvunni sinni og yfir sex hundruð hreyfimyndaskeið.

Mál mannsins komst í fréttirnar á síðasta ári þegar í ljós kom að hann sætti ekki gæsluvarðhaldi en sýslumaðurinn á Selfossi gerði aldrei kröfu um slíkt. Hann var síðar hnepptur í gæsluvarðhald.

Í dómi Hæstaréttar er tekið fram að það sé metið manninum til refsiþyngingar að hann hafi í mörgum tilvikum tekið hreyfimyndir og ljósmyndir af athæfi sínu gagnvart einni stúlkunni en af því mátti ráða að brotavilji hans hefði verið mjög styrkur og einbeittur.

Þetta er einn þyngsti dómur í kynferðisbrotamálum sem kveðin hefur verið upp hér á landi.