Sveinn Arason: "Það er við engan að sakast nema mig“

Ríkisendurskoðandi segist alfarið bera ábyrgðina á því að vinna við skýrslu um fjárhagskerfi ríkisins hafi dregist fram úr hófi. Hann segist ekki hafa íhugað afsögn vegna málsins.

Sveinn Arason mætti á sameiginlegan nefndarfund stjórnskipunar- og eftirlitsnefndar Alþingis og fjárlaganefndar. Þar var hann inntur skýringa á þeim drætti sem orðið hefur á vinnslu skýrslu sem unnin var um innleiðingu fjárhagskerfis ríkisins en gerð hennar hefur staðið yfir í um átta ár og er henni hvergi nærri lokið. Fjallað var um málið í Kastljósi í gær en kerfið var keypt af Skýrr árið 2001 og hljóðaði samningurinn upp á rúmann milljarð. Árið 2009 þegar drög að skýrslu Ríkisendurskoðunar um málið voru unnin, var kostnaðurinn kominn í fjóra milljarða.

Sveinn Arason ríkisendurskoðandi sagði að enn væri verið að vinna skýrsluna og því séu drögin aðeins óklárað plagg og ekki enn tæk til umsagnar. Hann viðurkenndi að vinnubrögð stofnunarinnar í málinu væru óviðunandi en hann átti ekki gott með útskýra ástæðuna fyrir því að vinnan hafi dregist úr hófi fram. Hann sagði þó að málið væri einsdæmi innan stofnunarinnar.

„Það er við engan að sakast nema mig," sagði Sveinn.

Á fundinum kom einnig fram að skýrsludrögin sem eru dagsett haustið 2009 hafi verið send fjársýslustjóra síðastliðið vor. Aðspurður hvort skýrslan hafi því engum breytingum tekið í þrjú ár svararði Sveinn: „Nei, ekki frá þeim tíma"

Sveinn sagði ekkert óeðlilegt við að forstjóri Fjársýslunnar, sem er til rannsóknar í skýrslunni, fengi að sjá skýrsluna en viðurkenndi þó að það væri frávik frá vinnureglum. Hann bætti því við að fjársýslustjóri hafi enn ekki skilað sínum athugasemdum.

Þór Saari þingmaður Hreyfingarinnar krefst þess að Sveinn segi af sér og vísaði til fjölskyldutengsla hans en bróðir hans vinnur hjá Fjármálaráðuneytinu og annar vann hjá Skýrr. Sveinn vísaði því hinsvegar alfarið á bug að þetta skipti máli. Hann tók við sem ríkisendurskoðandi árið 2008 og því ekki við stjórnvölinn þegar vinnan við skýrsluna hófst. Þá snúi málið að fjársýslu ríkisins en ekki fjármálaráðuneytinu.

Á fundinum var talað um trúnaðarbrest á milli Alþingis og stofnunarinnar og möguleikanum á skipun sérstakrar rannsóknarnefndar var velt upp. „Mér sýnist þetta mál vera öllu alvarlega en maður hélt í upphafi, hvernig sem á því stendur," segir Björn Valur, sem vill ekki ganga svo langt að krefjast afsagnar Sveins:

„Ég vil nú gefa ríkisendurskoðanda færi á að útskýra mál sitt frekar."

Að loknum fundi var Sveinn spurður hvort hann íhugi afsögn. Því svaraði hann neitandi.