Dómurinn kostar bankana tugi milljarða

Dómur Hæstaréttar í gær um vaxtaviðmið vegna ólöglegra gengistryggðra lána, þar sem eldri dómur frá í febrúar var staðfestur, mun kosta bankanna tugi milljarða. Engu að síður fagna bankarnir því að Hæstiréttur varpi frekari ljósi á það hvernig eigi að endurreikna lánin.

Landsbankinn segir jákvætt að gengið hafi dómur sem varpi frekari ljósi á það hvernig Hæstiréttur telur að standa eigi að endurreikningi gengistryggðra lána. Þetta kemur fram í tilkynningu sem bankinn sendi frá sér í dag í tilefni af dómi Hæstaréttar í máli Borgarbyggðar gegn Arion banka.

Landsbankinn telur að dómurinn staðfesti fordæmisgildi dóms Hæstaréttar frá 15. febrúar 2012 í máli Elvíru Mendes og Sigurðar Sigurðssonar gegn Frjálsa fjárfestingabankanum um gildi fullnaðarkvittana. Bankinn telur að hinn nýi dómur muni ekki hafa umtalsverð áhrif á fjárhag bankans, umfram þau sem áður hafði verið gert grein fyrir. En í uppgjöri fyrir síðasta ár voru gjaldfærðir 38 milljarðar króna undir liðnum „Tap af gengistryggðum útlánum og kröfum á viðskiptavini".

Landsbankinn segist nú yfirfara dóm Hæstaréttar með tilliti til fordæmisgildis, en segir að í þeim tilfellum þar sem niðurstaðan verði sú að lán verði endurreiknað á ný, muni innheimta til framtíðar að sjálfsögðu taka mið af leiðréttum eftirstöðvum. Hugsanlegar ofgreiðslur verði þannig leiðréttar.

Í yfirlýsingu sem Arion banki sendi frá sér í dag er tekið í svipaðan streng. Þar er tekið fram að í ársreikningi Arion banka fyrir árið 2011 hafi að fullu verið tekið tillit til áhrifa dóms Hæstaréttar frá því í febrúar. á lánasafn bankans með 13,8 milljarða króna niðurfærslu lánasafnsins. Dómur Hæstaréttar í gær breyti því engu þar um. Þó liggi ekki fyrir hver endanleg niðurfærsla lána verður í kjölfar þessara dóma. Það muni ekki liggja fyrir fyrr en að loknum endurútreikningi.

Þrátt fyrir þennan kostnað bankanna skiluðu þeir allir ríflegum hagnaði í fyrra, eins og fram kom í umfjöllun Fréttablaðsins í mars, eftir að uppgjör síðasta árs lá fyrir.