Guðrún enn spurningarmerki - viðræðurnar ekki komnar langt

„Það er eitt af þessum málum sem þarf að fara virkilega vel yfir," segir Hjálmar Hjálmarsson, bæjarfulltrúi Næst besta flokksins í Kópavogi, aðspurður hvort að Guðrún Pálsdóttir haldi áfram sem bæjarstjóri. Nú um helgina hófust formlegar viðræður á milil Sjálfstæðisflokksins, Y-Lista Kópavogsbúa og Næst besta flokksins um að mynda nýjan meirihluta í bæjarstjórn.

Meirihlutinn sprakk þegar segja átti Guðrúnu upp störfum. Hjálmar sagðist þá ekki geta unað við þau vinnubrögð sem einkenndu uppsögnina. Skömmu síðar gekk Listi Kópavogsbúa úr skaftinu.

Nú um helgina funduðu flokkarnir þrír. „Þetta er í biðstöðu. Við vorum að leggja spilin á borðið og svo þurfa bæjarfulltrúar að tala við sitt fólk og meta stöðuna," segir Hjálmar í samtali við fréttastofu nú í morgun. „Það eru einhverjir hjallar sem þarf að komast yfir, við erum í rauninni að taka okkur fyrstu skref í þessu," segir hann. Aðspurður hvaða hjallar það eru, segir Hjálmar: „Ég myndi ekki fara tjá mig um það í miðjum viðræðum," segir Hjálmar.

Ármann Kr. Ólafsson, oddviti sjálfstæðismanna í bænum, sagði í samtali við Vísi á föstudag að Sjálfstæðisflokkurinn myndi ekki gera kröfu um bæjarstjórastólinn. Hjálmar segir að í viðræðunum um helgina hafi verið rætt um hver skyldi gegna embætti bæjarstjóra en ekkert sé komið á hreint í þeim efnum.

Óljóst er hvenær flokkarnir funda næst en það mun komast á hreint um hádegi.