Bæjarfulltrúi verður ekki bæjarstjóri

Næsti bæjarstjóri í Kópavogi kemur ekki úr hópi kjörinna fulltrúa. Þetta segir Guðríður Arnardóttir, oddviti Samfylkingarinnar í bæjarstjórn Kópavogs, að hafi verið niðurstaða meirihlutafundar bæjarstjórnar síðdegis í gær.

Ekki hefur enn verið ákveðið hvernig verður staðið að ráðningu næsta bæjarstjóra eða hver það kynni að verða. „Við reynum að taka um það ákvörðun á allra næstu dögum," segir Guðríður.

Guðríður tilkynnti Guðrúnu Pálsdóttur, fráfarandi bæjarstjóra, síðastliðinn föstudag að meirihlutinn hefði hug á að ráða nýjan bæjarstjóra. Guðrún er hins vegar enn starfandi bæjarstjóri.

„Við eigum hins vegar eftir að funda með bæjarstjóra og ýmis mál sem við eigum eftir að ræða. Þangað til að sá fundur hefur farið fram þá ætlum við ekki að tjá okkur um hennar starfslok eða orsakir þeirra," segir Guðríður.

Að mati Guðríðar kom vel til greina að hún tæki sjálf við embættinu sem oddviti stærsta flokksins í meirihlutasamstarfinu, en Listi Kópavogsbúa hafi viljað ópólitískan bæjarstjóra.

„Og það skiptir okkur mjög miklu máli að þessi meirihluti starfi saman út kjörtímabilið," segir hún og vísar til margvíslegra verkefna sem ríði á að ljúka, svo sem stjórnsýsluumbóta sem séu byrjaðar, en hvergi nærri lokið.

- óká