Mikil sprengihætta við Hestfjörð

Mikil sprengihætta er við Hestfjörð, við sunnanvert Ísafjarðardjúp, eftir að olíubíll frá Skeljungi, með 39 þúsund lítra af bensíni, snérist í tvo eða þrjá hringi á glerhálku í gærkvöldi, uns vagninn með bensíngeyminum hafnaði ofan vegar á hvolfi og dráttarbíllinn ofan á honum.

Ökumaðurinn slapp lítið meiddur en var fluttur á sjúkrahúsið á Ísafirði til aðhlynningar. Ekki kom gat á geyminn, en bensín tók þó að vætla úr ventlum á honum og alveg niður í sjó.

Veginum var þegar í stað lokað og allir tiltækir slökkviliðsbílar og sjúkrabílar sendir á vettvang ásamt kranabíl og þremur olíubílum, til hægt verði að dæla bensíninu úr oltna bílnum.

Vegagerðin sandbar vegi og vettvang, en þar var vart stætt fyrir hálku. Kvoðu var svo úðað yfir bílinn og vagninn og undir morgun tókst slökkviliðsmönnum að aftengja rafmeyma bílsins og fjarlægja þá, þannig að dregið hefur úr mestu sprengihættunni.

Bensínfnykur er þó á vettvangi og sést brák út frá fjörunni fyrir neðan slysstaðinn. Rétt fyrir klukkan sjö var byrjað að dæla bensíni úr bílnum yfir í hina olíubílana en búist er við að Djúpvegur verði lokaður í þó nokkrar klukkustundir í viðbót.

Að sögn slökkviliðsmanns var það lán í óláni að bíllinn skyldi hafna ofan vegar en ekki fara sjávarmegin út af háum kanti og hafna í grýttri fjörunni.