Konur með PIP-púða bíða enn

Konur með PIP-púða geta enn ekki pantað sér tíma í skimun hjá Leitarstöð Krabbameinsfélagsins til að láta athuga hvort púðarnir eru rifnir. Ástæðan er að þær hafa ekki fengið formlegt bréf með gögnum frá lýtalækni sínum og velferðarráðuneytinu.

Tæpar þrjár vikur eru síðan gefið var út á vef Landlæknisembættisins að lýtalæknar sem hefðu notað PIP-púðana myndu senda viðkomandi konum bréf með nánari upplýsingum og ráðgjöf.

Jens Kjartansson lýtalæknir er sá sem mest notaði púðana. Þar sem hann einn hefur upplýsingar um hvaða konur fengu púðana hjá honum hafa heilbrigðisyfirvöld ekki getað sett sig í samband við þessar konur.

Jens er nú í veikindaleyfi en þær upplýsingar fengust hjá framkvæmdastjóra Domus medica, þar sem Jens er með einkastofu, að Jens hafi enn ekki sent út bréfin því hann sé að bíða eftir gögnum frá velferðarráðuneytinu sem eigi að fylgja með. Þar er meðal annars átt við aðgerðaáætlun stjórnvalda vegna PIP-málsins, sem raunar var birt í síðustu viku á vef ráðuneytisins.

Það sem vantar upp á eru nánari upplýsingar til kvenna um skimunina, ensamkvæmt aðgerðaáætlun stjórnvalda fá konur með PIP-púða skimun, þeim að kostnaðarlausu, hjá Leitarstöð Krabbameinsfélags Íslands.

Konur með PIP-púða geta hins vegar enn ekki pantað sér tíma í skimun því þær hafa ekki fengið umrætt bréf.

Samkvæmt upplýsingum frá ráðuneytinu verða upplýsingar sendar til lýtalækna á allra næstu dögum.