Eigandi Boot Camp býður Sóleyju í prufutíma

Boot Camp er bara venjuleg líkamsræktarstöð og á ekkert skylt við hernað, segir Arnaldur Birgir Konráðsson, annar eigenda Boot Camp, í samtali við Vísi. Vinstri græn hafa lagst gegn því að Boot Camp fái aðstöðu í húsi Fornbílaklúbbsins á Rafstöðvarvegi. Telja VG að ekki fari vel á því að koma fyrir á þessu svæði líkamsrækt með herbúðarsniði.

Arnaldur Birgir býður Sóleyju Tómasdóttur, oddvita VG í borgarstjórn, velkomna í tíma í stöðinni til að kynna sér það sem þar fer fram. „Ég vil bara endilega skora á hana að koma og prufa einn tíma hjá okkur. Ég býð henni það bara í boði hússins," segir hann.

„Það sem ber náttúrlega að líta á er að Boot Camp er bara eins og hver önnur líkamsrækt. Við erum með barnanámskeið, meögönguleikfimi, hlaupahópa og þetta er bara venjuleg líkamsræktarstöð. Þess vegna er þetta bara sprenghlægilegt," segir Arnaldur Birgir og bætir því við að Boot Camp hafi verið rekið í átta ár á Íslandi.

Arnaldur Birgir segir að markmiðið snúist um það að gera Elliðaárdalinn sem fallegastan. „Við hlökkum til að gera þennan Elliðaárdal enn betri en hann er. Okkur langar til að gera enn betur við þá sem eru duglegir að fara í dalinn og hreyfa sig. Það er eina markmiðið sem við höfum," segir Arnaldur Birgir.

Arnaldur Birgir segir að stefnt sé að því að nýja stöðin geti opnað í júni. „Við ætlum að gera það bara með pompi og pragt," segir hann.