Fjölskylda Ingólfs himinlifandi yfir árangrinum

„Þetta gekk framar vonum, það var húsfyllir og setið í hverju sæti fram á gang," segir Steingrímur Sævarr Ólafsson, talsmaður hóps sem stóð að uppboði til styrktar Ingólfi Júlíussyni ljósmyndara í gær. Uppboðið fór fram á Hótel Borg.

Ingólfur greindist með bráðahvítblæði (Acute Myelogenous Leukemia -­? AML) í byrjun október á þessu ári og hefur verið á sjúkrahúsi síðan. Upp úr áramótum fer hann svo til Svíþjóðar þar sem hann mun gangast undir mergsskipti. Hópurinn ákvað því að halda uppboð til styrktar honum og fjölskyldunni til að létta byrðarnar.

„Það var tekin sú ákvörðun að selja öll verkin. Í raun og veru settum vð ekkert lágmark. Menn buðu bara það sem þeir vildu og ég held að það sé óhætt að segja að þetta hafi farið eins vel og við vonuðumst til," segir Steingrímur Sævarr.

Steingrímur segir að það hafi verið mjög gaman að sjá mynd sem Ásgeir Ásgeirsson, Geiri í Prezz Photos, tók af þeim Steingrími J. Sigfússyni og Bjarna Benediktssyni en á myndinni takast þeir félagarnir á í sjómann. Ásgeir var aðalhugmyndasmiðurinn að uppboðinu.

„Það var rosalega gaman að sjá Steingrím J. mættan í salinn til að fylgjast með og ég sá að hann var mjög glaður með viðbrögðin sem hann fékk," segir Steingrímur Sævarr. Hann segir líka að eiginkona Ingólfs og dætur þeirra tvær hafi verið í salnum og fylgst með. „Og þær þrjár voru að sjálfsögðu himinlifandi með árangurinn," segir Steingrímur Sævarr. Þá hafi Jón Gnarr borgarstjóri bæði gefið verk og boðið í verk.