Hanna Birna ekki í formanninn í bili

Hanna Birna Kristjánsdóttir, frambjóðandi Sjálfstæðisflokksins, ætlar ekki í formannsframboð á næsta Landsfundi Sjálfstæðismanna í febrúar. Hún þótti koma einna best út úr prófkjöri Sjálfstæðisflokksins um helgina og er hæstánægð með stuðninginn sem hún túlkar sem ákall almennings um breytingar í stjórnmálum.

Hanna Birna var gestur í útvarpsþættinum Reykjavík Síðdegis á Bylgjunni í dag. Þar rifjaði hún upp að það er ekki nema ár síðan hún fór í formannsframboð gegn sitjandi formanni flokksins. Þá bauð hún sig gagngert fram til að gefa sjálfstæðismönnum val um hver leiddi flokkinn í komandi Alþingiskosningum. „Bjarni Benediktsson vann þær kosningar. Mér finnst að það eigi að virða það svo ég er ekki að fara í framboð gegn sitjandi formanni aftur í febrúar," sagði Hanna Birna. Hún útilokar þó ekki að bjóða sig fram til formanns á einhverjum tímapunkti.

Hanna Birna fékk ríflega 72% atkvæða í fyrsta sætið. Hún segist standa fyrir ný vinnubrögð í stjórnmálum og túlkar því stuðninginn sem hún hlaut í prófkjörinu sem ákall almennings um breytingar. „Ég vil að menn leggi meiri áherslu á sátt heldur en stöðug átök," segir hún og mun leggja áherslu á að vinna með öllum að málefnum almennings, óháð flokkslínum.

Hanna Birna hlakkar að eigin sögn mikið til að byrja að vinna með fólkinu á listum Sjálfstæðisflokksins. Hún telur að niðurstöður prófkjörsins sýni að Sjálfstæðisflokkurinn sé ekki hræddur við breytingar. „Almenningur vil blöndu af reynslu og endurnýjun," sagði hún.

Hanna Birna er ekki frá því að Sjálfstæðisflokkurinn hafi með árunum fjarlægst grunngildi flokksins. „Það á við um alla stjórnmálaflokka. Stjórnmálin eru orðin þannig að almenningur hefur ekki traust á þeim. Það þýðir ekki að hugsjónirnar séu ekki góðar og gildar," sagði hún í viðtalinu sem má nálgast í heild sinni hér að ofan.