Fíkniefni fundust í húsleitum

Töluvert magn fíkniefna fannst í húsleitum lögreglunnar á höfuðborgarsvæðinu um helgina. Þá var karl á þrítugsaldri handtekinn í íbúð í Breiðholti en grunur lék á að kannabisefni væru seld þaðan. Samkvæmt upplýsingum frá lögreglunni lagði mikla kannabislykt frá íbúðinni en í henni fundust um 170 grömm af af marijúana í söluumbúðum.

Þá lagði lögreglan sömuleiðis hald á tæplega 50 grömm af marijúana í söluumbúðum í kjallaraíbúð í vesturbænum. E-töflur fundust einnig á staðnum en gestkomandi maður í íbúðinni var handtekinn í kjölfarið.

Húsráðandi var hins vegar fjarstaddur en hann var kallaður á vettvang og yfirheyrður. Lögreglu hafði borist tilkynningar um tíðar mannaferðir í íbúðina á öllum tímum sólarhrings og þegar hún mætti á vettvang lagði mikinn kannabisþef af íbúðinni.