Dæmd fyrir ærumeiðingar á vefsíðu Mottumars

Fjörtíu og fimm ára gömul kona, fagstjóri líffræðagreina í menntaskóla á höfuðborgarsvæðinu, var dæmd í 30 daga skilorðsbundið fangelsi til tveggja ára í Héraðsdómi Reykjavíkur í dag fyrir ærumeiðandi aðdróttanir gagnvart karlmanni á veraldarvefnum.

Konan ritaði ógeðfelld skilaboð á vefsíðu Mottumars í mars síðastliðnum, en alls ritaði konan sex færslur við mynd af manninum, sem þar birtist, þar sem hann freistaðist til þess að safna fé til stuðnings Krabbameinsfélagsins.

Meðal ummæla voru eftirfarandi færslur:

„Drepstu viðbjóður

Fáir heita á þig enda ættir þú líklega frekar að drepa þig en reyna að safna áheitum fyrir þetta málefni. Ekki einu sinni þínir nánustu vilja styrkja þetta ófrumlega þema þitt, drekktu þig í hel, drepstu og láttu líf fyrir þau líf sem þú hefur tekið! Líklega er þér eitthvað að hefnast fyrir drápin á saklausum lífum. Bíllinn farinn og íbúðin eftir smá. Vonum að lífið sé alltaf yndislegt hjá þér enda er vont að drepast ósáttur! Drepstu viðbjóðurinn þinn og rotnaðu í því helvíti sem þú átt skilið!"

Og svo: „Ljótleikinn er jafn að utan sem innan hjá þér

Ljótleikinn er jafn að utan sem innan hjá þér! Hrukkur, pokar og sjúskleiki finnst örugglega líka að innan með þér :-) Enda drakk víst líka þinn innri maður og drekkur enn stíft líkt og sá sem myndin er af! Andlitið sem er eins rotnað epli líkist rotnaðri sálinni og öfugt! Þú ert ekkert annað en heppinn að hafa hitt jafn rotna manneskju og þú ert! Vitað er að þú og sambýliskonan runkið ykkur reglulega yfir óförum og vanlíðan annara!"

Konan spurði einnig hvort hann væri hættur að lemja konuna sína og börn.

Ekki er ljóst hvernig konan tengist manninum en hún játaði brot sín skýlaust. Konan var síðast dæmd í desember árið 2011 fyrir brot gegn barnaverndarlögum með því að hafa sent syni mannsins, sem hún er dæmd fyrir áreita núna, smáskilaboð sem voru til þess fallin að særa hann og móðga. Með þessu broti rauf hún skilorð, og var hún því dæmd í 30 daga fangelsi, eins og fyrr sagði, og er sú refsing skilorðsbundin til tveggja ára.