Þekktir vísindamenn fræðast um uppruna lífs á Íslandi

Nokkrir af fremstu vísindamönnum veraldar á sviði stjörnulíffræði eru væntanlegir til landsins en þeir munu taka þátt í alþjóðlegum sumarskóla sem haldin er í annað sinn hér á landi.

Skólinn ber heitið Vatn, Ís og uppruni lífs í alheimi. Á fimmta tug framhaldsnema og ungra vísindamanna frá Evrópu, Norður og Suður Ameríku taka þátt í skólanum en hann fer fram dagana 2. til 15. júlí.

Það eru NordForsk, Hawaiiháskóli, NASA Astrobiology Institute og Háskóli Íslands sem standa að verkefninu.

„Þessi vísindamenn koma hingað til lands til að læra um vatn og uppruna lífs í alheiminum," segir Sævar Helgi Bragason hjá Stjörnufræðivefnum. „Ísland þykir afar heppilegur staður til fjalla um þessa hluti, landið er ungt og aðgengi að jöklum og hrauni er gott."

Ásamt því að funda um og ræða tilurð lífs munu vísindamennirnir ferðast víða um landið og taka meðal annars sýni úr Landmannalaugum, Fimmvörðuhálsi og úr jöklum — þar sem líf þrífst við erfiðar aðstæður.

Mikilvægi skólans er ótvírætt að mati Sævars: „Hingað koma nokkrir af fremstu vísindamönnum heims á sínum sviðum sem leitast við að svara spurningum um uppruna lífs. Þetta hefur mikla þýðingu fyrir áframhaldandi vísindasamstarf."

Mánudagskvöldið 2. júlí verður boðið upp á fræðslukvöld fyrir almenning í tilefni sumarskólans. Þá flytur stjörnufræðingurinn Karen Meech fyrirlestur um niðurstöður rannsókna tveggja gervitungla á halastjörnum og hvað þær hafa að segja um uppruna vatns á jörðinni. Erindið fer fram í salnum Gullteigur á Grand Hótel í Reykjavík. Aðgangur er ókeypis og eru allir velkomnir.

Hægt er að nálgast allar upplýsingar um verkefnið á Stjörnufræðivefnum.