Mikil aukning ferðamanna í Leifsstöð

Alls fóru 33.600 erlendir ferðamenn frá landinu í nýliðnum marsmánuði eða tæplega sjö þúsund fleiri en í sama mánuði árið 2011 og nemur aukningin 26,2 prósentum á milli ára. Þetta er vel yfir meðallagi en á þeim ellefu árum sem Ferðamálastofa hefur talið ferðamenn í Leifsstöð hefur aukningin að jafnaði verið tæp átta prósent. Ferðamenn í nýliðnum mars voru tæplega helmingi fleiri en í sama mánuði árið 2002.

„Af einstaka þjóðernum voru flestir ferðamenn í mars frá Bretlandi eða 27,1% af heildarfjölda. Næstfjölmennastir voru Bandaríkjamenn eða 13,4% af heildarfjölda, síðan komu Norðmenn (9,4%), Danir (8,0%), Þjóðverjar (6,0%), Frakkar (5,2%), Svíar (5,0%) og Hollendingar (3,8%). Samtals voru þessar átta þjóðir 77,9% af heildarfjölda ferðamanna í mars," segir í tilkynningu frá iðnaðarráðuneytinu.

„Frá áramótum hafa 87.658 erlendir ferðamenn farið frá landinu sem er um 22 prósenta aukning frá árinu áður. Um 54% aukning hefur verið í brottförum Breta, um fjóðungsaukning (25,3%) í brottförum N-Ameríkana og sama aukning frá löndum sem flokkast undir ,,Annað". Brottförum Norðurlandabúa hefur fjölgað lítils háttar eða um 6,6%. Mið- og S-Evrópubúum hefur hins vegar fækkað lítils háttar," segir einnig.