Best geymda leyndarmál íslenskra kvenna

Farið er afar fögrum orðum um Bláa Lónið á heimasíðu kanadíska Elle þar sem farið er yfir áhugaverða staði í heiminum til þess að fara í dekur yfir vetrartímann.

Það er blaðakonan Natalie Bahadur sem skrifar greinina en hún skellti sér í Kísil- og saltskrúbb ásamt nuddi í Lóninu sem hún vill meina að þetta sé best geymda leyndarmál íslenskra kvenna.

"Ef fólk á Íslandi veit ekki hvernig það á að mýkja þurra vetrarhúð, veit það enginn," segir Bahadur greinilega heilluð af Bláa Lóninu.

Íslenskar konur duglegar að nýta sér dekur í Bláa Lóninu.

"Íslenskar konur eru þekktar fyrir að hafa fallega húð sem má m.a. þakka góðu vatni og heilnæmu lofti. Náttúruleg hráefni Blue Lagoon jarðsjávarins, steinefni, kísill og þörungar veita húðinni heilbrigðan og fallegan ljóma. Þetta þekkja íslenskar konur sem eru duglegar að koma til okkar," sagði Magnea Guðmundsdóttir kynningastjóri Bláa Lónsins þegar Lífið heyrði í henni vegna fréttarinnar.

Hún segir einnig að það sé sérstaklega vinsælt hjá vinahópum sem vilja gera sér dagamun og dekra við líkama og sál að kíkja í lónið.

Erlendir gestir kunna einnig vel að meta áhrif Bláa Lónsins og á sl. ári kom það fram í People Magazine að leikkonan Teri Hatcher er meðal þeirra sem hafa notið góðra áhrifa Bláa Lónsins.

Hér má lesa færsluna í heild sinni.