Tímasetning undirskriftar þarf alls ekki að skipta máli

„Þetta hefur ekkert með skjalafals að gera," sagði Brynjar Níelsson, hæstaréttarlögmaður en hann var gestur í útvarpsþættinum Reykjavík síðdegis í dag.

Brynjar var spurður álits um mögulegt skjalafals sem Bjarni Benediktsson, formaður Sjálfstæðisflokksins, á að hafa staðið í með undirritun samninga þremur dögum eftir að samningarnir voru gerðir.

Brynjar sagði að dagsetningar skipti ekki höfuðmáli við samningagerð. „Þetta er í raun eins og þegar tveir menn skrifa undir samning og þeir eru ekki á staðnum á sama tíma. Þá er farið með skjalið á milli. Þetta getur gerst með ýmsum hætti."

Hann sagði að dagsetningin skipti engu máli nema þegar hún hafi áhrif á lögskiptin. „Það er að segja þegar einhver réttaráhrif eru bundin við tiltekin dag. Svo eru menn að dagsetja aftur í tímann til að blekkja með í lögskiptunum. Þá er það orðið að skjalafalsi."