Hundaeigandi sakaður um stórkostlegt gáleysi

Hundaeigandi hefur verið ákærður fyrir að hafa sýnt af sér stórkostlegt gáleysi með þeim afleiðingum að sautján hundar í hans umsjá réðust á og stórslösuðu konu, sem telur óvíst hvort hún jafni sig nokkurn tímann eftir lífsreynsluna.

Eigandinn, sem er þrjátíu og átta ára gömul kona, var að viðra hundana á útivistarsvæði í Sandgerði í maí síðastliðnum þegar þeir tóku á rás í átt að Guðrúnu Guðmundsdóttur, sem var á svæðinu við eggjatínslu. Á örskammri stund var hún umkringt hundum sem bitu hana með þeim afleiðingum að hún hlaut sex djúp bitsár og fjölmargar skrámur. Hún kærði eigandann og það var í dag sem ríkissaksóknari gaf út ákæru í málinu. Við heimsóttum Guðrúnu sem sagðist bæði vera glöð og sorgmædd.

„Ég er glöð yfir því að réttarramminn skuli vera virtur varðandi hundahald og meðferð dýra, og sorglegt að þetta skuli þurfa að fara svona. Að það skuli þurfa að vera stórslys, það var margítrekað búið að kæra þessa konu fyrir hundahald og slæma meðferð á dýrum og það er ekkert gert fyrr en ég t.d. lendi í þessu. Þetta hefði getað verið verra."

Eigandinn getur átt yfir höfði sér allt að fjögurra ára fangelsisdóm verði hann fundinn sekur, en honum var á sínum tíma gert að láta lóga hundunum sautján. Atvikið hefur haft og hefur enn mikil áhrif á líf Guðrúnar.

„Ég náttúrulega er dauðhrædd þegar ég fer ein út að labba og ég hrekk í kút þegar ég fer út að labba og er alltaf á varðbergi þegar ég sé lausa hunda. Ég er alvön hundum og hef ekki verið hrædd við hunda en þetta hefur tekið rosalega mikið frá mér. Bara það að vera ein einhversstaðar úti í náttúrunni, ein að labba einhversstaðar sem ég gerði mikið af. Ég finn fyrir þessu og veit ekki hvort ég jafni mig einhverntímann á þessu."