Kærleiksmaraþon og knús

"Við unglingarnir höfum mjög mikinn metnað fyrir Vinavikunni, erum öll saman að skipuleggja viðburði vikunnar. Stefán Már Gunnlaugsson, presturinn okkar, hefur hjálpað okkur með hugmyndirnar, en við framkvæmum þær svo," segir Sverrir Hrafn Friðriksson, nemandi í 10. bekk í Vopnafjarðarskóla.

Unglingar í æskulýðsstarfi Vopnafjarðarkirkju hafa sett mikinn svip á bæinn í vikunni. Þeir hafa, nú þriðja árið í röð, staðið fyrir Vinaviku í bænum. Vikan hófst síðastliðinn sunnudag með Vinabíói og á hverjum degi í vikunni hafa unglingar í bænum staðið fyrir skemmtilegum uppákomum. Sverrir Hrafn segir vikuna hafa gengið mjög vel.

"Við höfum gert margt mjög skemmtilegt í vikunni. Á mánudag vöknuðum við eldsnemma, klukkan sjö, og gengum um bæinn og settum fallega orðsendingu á dyrahúna hjá fólki í bænum. Við stóðum fyrir Vinaskrúðgöngu á fimmtudag og fengum marga bæjarbúa til að taka þátt í henni, enda vorum við reyndar búin að vekja mikla athygli á henni með því að fara um bæinn í traktorsvögnum fyrr í vikunni," segir Sverrir Hrafn.

Vopnfirsk ungmenni hafa í Vinavikunni einnig bankað upp á hjá íbúum bæjarins og boðist til að aðstoða þá við húsverkin. "Það er mjög vinsælt að fá okkur til þess að þrífa glugga og sópa stéttir." Í gær buðu ungmennin svo upp á knús og fóru létt með það. "Við erum ekkert feimin við að vera vinaleg og ekkert að hugsa um hvort við séum kjánaleg. Það eru allir svo ánægðir með okkur og maður verður auðvitað svo miklu vinalegri þegar maður tekur þátt í Vinavikunni."

Sverrir Hrafn hefur tekið þátt í Vinavikunni í þau þrjú ár sem hún hefur verið haldin en nemendur í 8., 9., og 10. bekk standa að vikunni. Markmið unglinganna er að safna sér fyrir ferð á landsmót æskulýðsfélaga á Egilsstöðum. "Söfnunin gengur mjög vel, en við erum ekkert að hugsa um hana öllum stundum, heldur erum bara að njóta lífsins í Vinavikunni."

Á morgun er lokadagur vikunnar og ein aðaluppákoman, Kærleiksmaraþonið. "Þá bjóðum við í kaffi og kökur í safnaðarheimilinu að lokinni messu, og svo er pitsuveisla og flugeldasýning líka," segir Sverrir Hrafn að lokum.