Mamma kom aldrei aftur heim

Leikarinn Hugh Jackman opnar sig í nýjasta hefti tímaritsins Australian Women's Weekly og deilir sársaukafullri reynslu úr fortíð sinni.

Móðir hans, Grace Watson, yfirgaf hann þegar hann var aðeins átta ára gamall. Að sögn Hughs flúði hún til Bretlands og sagði fjölskyldunni fréttirnar í gegnum símskeyti.

"Eitt af mörgu sem ég man er þessi hræðilega tilfinning þegar fólk talar um þig og horfir á þig því það var skrýtið að móðir mín skyldi fara," segir Hugh. Hann gerði sér ekki grein fyrir því fyrr en hann var tólf eða þrettán ára að mamma hans myndi aldrei koma heim aftur.

"Ég fann aldrei fyrir því, og þetta hljómar kannski skringilega, að mamma elskaði mig ekki. Ég hef talað um þetta við hana síðan og ég veit að hún átti erfitt. Hún var á sjúkrahúsi eftir að ég fæddist og þjáðist af fæðingarþunglyndi. Hún hafði engan stuðning."