Vantar sárlega sérhæfðan lækni

„Við viljum vekja athygli á því að hér er enginn barnagigtarlæknir. Jón Kristinsson hefur séð um börn með gigt síðustu tuttugu til þrjátíu árin. Hann er krabbameinslæknir og er alveg frábær. Hann mun hætta eftir eitt ár. Það er búið að finna einn í staðinn en hann er ekki barnagigtarlæknir“, segir Birna Kristrún Halldórsdóttir, foreldri barns með gigt.

Birna er ein af forsvarsmönnum matarboðs sem haldið var á dagdeild Barnaspítala Hringsins.

„Við viljum vekja athygli á því að það greinast tólf til fjórtán börn á hverju ári með alvarlegan gigtarsjúkdóm sem getur háð þeim til langframa,“ segir Birna.

Hún bendir á að þetta séu fleiri börn en þau sem greinast árlega með krabbamein. Málefnið sé því brýnt.

Margir gestir létu sjá sig á Barnaspítalanum í gær. Íbúar Latabæjar kíktu í heimsókn og Friðrik Dór ásamt Jóni Jónssyni héldu uppi skemmtun. Í hádeginu mættu svo Simmi og Jói og grilluðu hamborgara fyrir sjúklinga, starfsfólk og aðra sem kíktu inn. - ktg