Fær ekki aðgang að upplýsingum um Kaupþingsmenn

Úrskurðarnefnd um upplýsingamál hefur hafnað ósk lögmanns um að fá afhent frá Þjóðskjalasafni upplýsingar um skýrslutökur yfir fimm fyrrverandi starfsmönnum og stjórnendum Kaupþings hjá rannsóknarnefnd Alþingis.

Þjóðskjalsafn hafði áður hafnað ósk mannsins um að fá aðgang að öllum gögnum og skjölum sem tengdust Kaupþingi, hvort heldur þau væru á rafrænu eða prentuðu formi, sem rannsóknarnefnd Alþingis aflaði og/eða hafði undir höndum í tengslum við gerð skýrslu sinnar.

Lögfræðingurinn kærði synjun Þjóðskjalasafnsins til úrskurðanefndar um upplýsingamál. Úrskurðarnefnd um upplýsingamál komst að þeirri niðurstöðu, að meðal annars á grundvelli bankaleyndar, væri Þjóðskjalasafni ekki skylt að láta upplýsingarnar af hendi.