Arnarhreiður skemmt af mannavöldum

Í vikunni vaknaði grunur um að spillt hefði verið fyrir varpi hafarnarhjón í eyju á sunnanverðum Breiðafirði, því það sást ekki lengur til parsins sem vikurnar á undan hafði undirbúið varp og byggt hreiður. Málið hefur verið kært til lögreglu.

Á vef Nátturustofu Vesturlands segir að sést hafi til arnanna á svæðinu undanfarin tvö ár en fylgst hefur verið með þeim úr landi frá því þeir sáust fyrst í vor. „Í gær fóru fulltrúar Náttúrustofu Vesturlands og Fuglaverndar í eyjuna til að skoða verksummerki og var aðkoman ófögur. Sýnilegar skemmdir höfðu verið unnar á hreiðrinu með því að róta í því og kasta hluta hreiðurefnanna fram af klettum niður í fjöru. Skemmdirnar eru tvímælalaust af mannavöldum. Ekki er vitað hvort örninn var orpinn þegar þetta átti sér stað en ef svo er, þá voru eggin horfin," segir á vefnum.

Málið er litið mjög alvarlegum augum, enda hefur örninn verið strangfriðaður í tæpa öld, og eru þeir sem gætu haft einhverjar upplýsingar um málið hvattir til að koma þeim á framfæri við lögregluna.