Stækkun virkjunar á að hefjast á þessu ári

HS Orka ætlar að ljúka nýjum orkusölusamningi og byrja að stækka Reykjanesvirkjun í ár. Framkvæmdum á að ljúka á fyrri hluta ársins 2014. Verið er að ræða við Norðurál. Áformin voru kynnt á fundi með fjárfestum í síðustu viku.

HS Orka ætlar sér að ljúka nýjum orkusölusamningum á fyrri hluta ársins 2012 og byrja framkvæmdir við að auka framleiðslugetu Reykjanesvirkjunar um 80 MW á síðari hluta þess. Stefnt er að því að fyrri hluti næstu stækkunar Reykjanesvirkjunar, sem kallast Reykjanes 3, verði lokið á síðari hluta ársins 2013. Hinn hlutinn, Reykjanes 4, á að klárast á fyrri hluta ársins 2014. Þetta kemur fram í kynningu sem Alterra Power, eigandi 75% af hlutafé í HS Orku, hélt fyrir fjárfesta 6. janúar síðastliðinn. Jarðvarmi, félag í eigu íslenskra lífeyrissjóða, á fjórðung í HS Orku.

Að sögn Ásgeirs Margeirssonar, eins af aðstoðarforstjórum Alterra Power, eru einu samningaviðræðurnar sem í gangi eru við Norðurál vegna mögulegrar orkusölu HS Orku til álvers í Helguvík. Fyrirtækið gerði orkusölusamning við Norðurál árið 2007 sem ágreiningur var uppi um hvort væri gildur. Málinu var skotið til gerðardóms í Svíþjóð sem komst að þeirri niðurstöðu í desember síðastliðnum að samningurinn væri í gildi. Hins vegar eru fyrirvarar í niðurstöðunni um að þær framkvæmdir sem HS Orka þarf að ráðast í til að uppfylla samningin séu arðbærar. Forsvarsmenn HS Orku telja þær ekki vera það samkvæmt núverandi samningi.

Í tilkynningu sem HS Orka sendi frá sér vegna gerðardómsins kemur fram að HS Orka muni „vinna með Norðuráli að því að ná ásættanlegri niðurstöðu varðandi þau atriði sem upp hafa komið með þessum úrskurði“.

Heimildir Fréttablaðsins herma að í kynningu Alterra frá því í síðustu viku sé gert ráð fyrir því að viðunandi samningar náist við Norðurál. Þeir myndu fela í sér að hægt væri að ráðast í þriðja og fjórða hluta uppbyggingar á Reykjanesvirkjun sem mundi skila um 80 MW af orku. Í kynningunni er gert ráð fyrir að framkvæmdir við þá stækkun hefjist á seinni hluta þessa árs og að henni verði að fullu lokið á fyrri hluta árs 2014. Öll virkjanaleyfi fyrir þeim stækkunum liggja þegar fyrir. Þar er einnig sagt að stefnt sé að því að virkja um 50 MW af orku í Eldvörpum fyrir lok árs 2016. Á meðal næstu verkefna Alterra sé að fjármagna þriðja og fjórða áfanga Reykjanesvirkjunar og virkjun Eldvarpa.

Ef ekki nást samningar við Norðurál mun það fresta áætlunum Alterra fyrir HS Orku eitthvað en ekki breyta þeim. Verði viðræðunum endanlega slitið munu nýjar hefjast við aðra áhugasama orkukaupendur. thordur@frettabladid.is