Milljarðakrafa Reykjavíkur lifir

Hæstiréttur hefur blásið lífi í rúmlega 1,2 milljarða kröfu Reykjavíkurborgar í bú Landsvaka, sem Héraðsdómur Reykjavíkur hafði áður vísað frá dómi. Hæstiréttur felldi niðurstöðu héraðsdóms úr gildi á fimmtudag og vísaði málinu aftur heim í hérað.

Málið snýst um eign borgarinnar í peningamarkaðssjóði á vegum Landsbankans, sem Landsvaki hafði umsjón með. Alls átti borgin um fjóra milljarða í sjóðnum. Þegar honum var slitið fengust tæplega sjötíu prósent greidd út en borgin lýsti kröfu í þrotabú Landsbankans og Landsvaka vegna afgangsins, ríflega 1,2 milljarða.

Héraðsdómur vísaði málinu á hendur Landsvaka frá á þeim grundvelli að borgin stæði þegar í málaferlum við gamla Landsbankann vegna nákvæmlega sama máls. Það væri andstætt lögum.

Hæstiréttur er hins vegar á öðru máli og telur að um óskyld mál sé að ræða. Landsvaki og Landsbankinn séu ólíkir lögaðilar og kröfurnar ekki þær sömu í báðum málunum í skilningi laga. Það er því lagt fyrir héraðsdóm að taka efnislega afstöðu til kröfunnar. - sh