Draumur rafvirkjans knúinn af vindinum

Hrafnkell Guðjónsson og Eyjólfur Jóhannsson, rafverktakar á Héraði, vona að kínverskar vindmyllur lækki rafmagnsreikninga verulega hjá þeim sem ekki hafa hitaveitu. Tilraunamylla verður farin að snúast um næstu mánaðamót.

„Það er fyrst núna sem við erum að láta gamla drauma rætast,“ segir Hrafnkell Guðjónsson rafverktaki sem fengið hefur leyfi til uppsetningar á vindmyllu við heimili sitt á Rauðalæk á Héraði.

„Þetta er stöð sem getur framleitt fimm kílóvött þegar vel lætur og hentar vel fyrir sveitabæi og minni notendur,“ segir Hrafnkell um vindmylluna sem setja á upp á Rauðalæk.

„Þetta er tilraunaverkefni í gegnum fyrirtæki okkar Rafey,“ heldur Hrafnkell áfram. „Ætlunin er að nota mylluna sem meðafl, fyrst og fremst erum við að hugsa um þetta á köldum svæðum fyrir kyndingar. Þetta er hentugt fyrir kyndingar því þær þola mikla sveiflu í spennu.“

Sjálfur býr Hrafnkell í gömlu félagsheimili á Rauðalæk og kveðst fá um 55 þúsund króna rafmagnsreikning á hverjum mánuði enda er öll 350 fermetra byggingin kynnt með rafmagni eins og önnur hús á þessu hitaveitulausa svæði. Hann segir löngu kominn tíma til að beisla vindinn til að draga úr þessum kostnaði. „Ég tala nú ekki um þegar verið að er að ræða um sjö prósenta hækkun á dreifigjaldi fyrir rafmagn í dreifbýli. Það er allt sem kallar á þetta,“ segir hann.

Að sögn Hrafnkels hefur hann lengi spáð í raforkuframleiðslu með vindmyllum og gert tilraunir við bæ sinn. „Við erum á fullu að hugsa um þetta og höfum verið að því í tugi ára. Ef þetta gengur þá verður myllan ekki lengi að borga sig fyrir mig. Miðað við það sem við erum búnir að sjá eru þetta tölur sem eru hagstæðar fyrir þessa gerð af notkun,“ segir hann.

Vindmyllan er af Huaya-gerð, smíðuð í Kína og hefur sex metra vænghaf. Undirstöður fyrir tólf metra hátt mastur sem bera á mylluna eru tilbúnar og hún gæti verið komið í gagnið um mánaðamótin.

„Fylgst verður vel með virkni myllunnar og mælingar gerðar á getu hennar til upphitunar. Sviptivindar eru algengir þar sem myllan verður sett upp og því fæst einnig reynsla af hvernig hún stendur sig í roki,“ segir Eyjólfur Jóhannsson hjá Rafey. Þótt myllan sé fyrst og fremst hugsuð til upphitunar segir Eyjólfur líka hægt að tengja við hana venjuleg ljós og rafmagnstæki.

„Það er fyrsta skrefið að prófa þessa myllu. Ef hún kemur vel út þá fáum við stærri,“ segir Hrafnkell. „Við fengum reyndar líka eina minni sem er tvö kílóvött og er meira fyrir sumarhús og veiðikofa. Við erum rétt að byrja.“

gar@frettabladid.is