Lítil aukning á flugi frá landi þrátt fyrir aukna samkeppni

Þótt fjögur ný flugfélög verði starfandi á Íslandi næsta sumar fjölgar flugferðum frá landinu ekki nema um fjórtán á viku. Þetta kemur fram á vefsíðunni túristi.

Nýir áfangastaðir eru tveir, Denver í Bandaríkjunum með Icelandair og Lyon í Frakklandi með Wow Air.

Icelandair verður með tvo þriðju af flugi frá landinu í júlí, en tíunda hver vél sem tekur á loft verður á vegum Iceland Express - sem er mikill samdráttur frá í fyrra þegar fjórða hver brottför var á vegum Iceland Express.

Í þriðja sæti verður nýja félagið Wow Air sem flýgur 23 í viku frá landinu í júlí. Alls verða 300 brottfarir á viku frá Keflavíkurflugvelli í júlí, samanborið við 286 í sama mánuði í fyrra.