Þetta er einhvers konar sambabolti

Brasilíumaðurinn Ife Tolentino, samstarfsmaður Óskars Guðjónssonar, gaf Sócrates eiginhandaráritun.

„Þetta eru allt einhvers konar ástarsöngvar, hvort sem ástin fer vel eða illa,“ segir saxófónleikarinn Óskar Guðjónsson.

Hann hefur gefið út plötuna Vocé Passou Aqui ásamt brasilíska söngvaranum og gítarleikaranum Ife Tolentino. Þeir félagar kynntust fyrir tólf árum í London þegar Óskar var búsettur þar í borg.

„Ég elti konuna mína sem var á leiðinni þangað í nám og það eina sem ég var með á stefnuskránni var að hitta alvöru brasilískan bossanóva-spilara. Það bentu mér allir í áttina til Ife,“ segir Óskar. „Það mynduðust strax rosalega sterk vináttutengsl okkar á milli.“

Ife hefur komið til Íslands á hverju ári undanfarin tíu ár. Hann spilaði til dæmis í brúðkaupi Óskars sumarið 2002 og horfði daginn eftir með honum á úrslitaleik heimsmeistarakeppninnar í fótbolta sem Brasilíumenn unnu. Ife hefur einmitt vakið athygli þarlendra knattspyrnumanna því eitt sinn þegar hann var bassaleikari með þekktum brasilískum söngvara bað fyrrum landsliðsmaðurinn Sócrates hann um að árita fyrir sig plötuna þeirra. „Þetta er ansi magnað fyrir okkur sem könnumst við Sócrates og Zico,“ segir Óskar.

Nýja platan er sú fyrsta sem Óskar og Ife gera saman. „Þetta er gífurlega krefjandi músík að spila. Þetta er einhvers konar sambabolti. Hún er léttleikandi á yfirborðinu en það er alveg hellingur í gangi.“

Útgáfutónleikar Óskars og Ife verða í Iðnó í kvöld og hefjast þeir klukkan 21. - fb