„Ég vil eiga þátt í að byggja upp þetta samfélag“

„Samfylkingin villtist af leið í hruninu en flokkurinn hefur nú reynt að auka jöfnuð í samfélaginu, að leiðrétta það misrétti sem var á þeim tíma."

Þetta sagði Guðbjartur Hannesson, þingmaður Samfylkingarinnar, í útvarpsþættinum Sprengisandi á Bylgjunni í dag. Guðbjartur ræddi þar við þáttastjórnanda um ákvörðun sína um gefa kost á sér í formannsembætti Samfylkingarinnar.

„Ég vil eiga þátt í því að byggja upp þetta samfélag nú þegar við höfum svigrúm til að gera það," sagði Guðbjartur. „Og þess vegna býð ég mig fram."

Hann segir að tímabil niðurskurðar sé brátt á enda.

„Við höfum gengið í gegnum erfiðan niðurskurð og nú er tími til að byggja aftur upp," segir Guðbjartur og bendir á að nauðsynlegt sé að horfa til allra stétta þegar tími endurreisnar gengur í garð. „Við verðum að skoða af hverju vissar stéttir búa við lakari kjör en aðrar, það er fyrir öllu."

Þá segir Guðbjartur að ríkisstjórnin hafi sannarlega staðið sig vel en bendir þó á að alltaf megi gera betur.

„Við viljum búa í opnu og frjálsu samfélagi, hafa samkeppni og frjálst efnahagslíf. Við búum ekki við þær aðstæður í dag," segir Guðbjartur og bætir við: „Þessi grundvallaratriði hafa haldið norðurlöndunum uppi ásamt háum sköttum sem skila sér aftur út í samfélagið."

Guðbjartur segir samstarf sitt og Árna Páls Árnasonar, sem einnig hefur ákveðið að bjóða sig fram til formanns Samfylkingarinnar, hafa verið ágætt. Þá á hann ekki von á að fleiri muni gefa kost á sér.