Höskuldur ánægður með stöðu sína

„Ég er bara mjög ánægður með þá kosningu sem ég fékk í fyrsta sætið. Þetta er töluvert meira en ég gerði mér væntingar um í ljósi þess að ég var að keppa við formann flokksins," segir Höskuldur Þórhallsson, þingmaður Framsóknarflokksins. Hann mun skipa annað sætið á lista Framsóknarflokksins í Norðausturkjördæmi. Sigmundur Davíð Gunnlaugsson, formaður flokksins, verður í fyrsta sæti. Kosið var á listann í gær.

Höskuldur fékk 35% kosningu í fyrsta sætið og segist Höskuldur vera mjög ánægður með það. „Það er bara mjög viðunandi, en ég get ekki verið annað en mjög glaður með þá yfirburðakosningu sem ég fékk í annað sætið," segir Höskuldur. Hann segir stöðu sína sterka í kjördæminu og þá sérstaklega á þeim svæðum sem flestir kjósendur flokksins komi frá, sem sé fyrst og fremst Eyjafjarðarsvæðið.

Höskuldur sóttist eftir fyrsta sætinu, eins og Sigmundur Davíð, en Sigmundur var á lista flokksins í Reykjavík í síðustu kosningum. „Ég vildi leiða flokkinn vegna þess að ég hef nú bara sýnt það í gegnu tíðina og taldi að það væri farsælast til að ná góðri kosningu í vor að það yrði heimamaður sem myndi skipa fyrsta sætið," segir Höskuldur.