Milljónatjón í brunanum á Óseyrarbraut

Milljóna tjón varð í eldsvoða í fiskvinnslu við Óseyrarbraut í Hafnarfirði í nótt, framkvæmdastjórinn segir mikla vinnu framundan en vonast til að geta hafið vinnslu í öðru húsi bráðum. Slökkviliðsmenn voru enn að slökkva í glóðum á vettvangi síðdegis í dag.

Allt tiltækt lið slökkviliðsins á höfuðborgarsvæðinu var kallað að fiskvinnsluhúsum Svalþúfu við Óseyrarbraut í nótt vegna eldsvoða í húsunum, hátt í sextíu slökkviliðsmenn voru að störfum þegar flest var.

Lögregla og slökkvilið voru enn að störfum hér að Óseyrarbraut í hafnarfirði þegar fréttastofu bar að garði í dag.

Þegar lögreglumenn voru að rannsaka vettvanginn síðdegis kom aftur upp eldur í glóðum sem kraumað höfðu í einangrun þaksins frá því um nóttina. Þurfti því að rífa gat á þak hússins svo hægt væri að slökkva allan eld.

„Þetta hleypur á einhverjum milljónum, ég veit ekki hvort það eru tugir milljóna, allavega þarf að skipta um þakið og mjög margt ónýtt hérna í húsinu, einhverjar afurðir líka og hráefni,.en ég veit ekkert, það er rétt að klárast lögreglurannsókn á eldsupptökum og síðan tekur við tjóna mat með tryggingafélögunum," segir Magnús Gylfason, framkvæmdastjóri Svalþúfu.

Í salnum þar sem eldurinn kom upp fer fram þurrkun á fisk en talið er að eldurinn hafi kviknað út frá rafmagnstæki í herbergi þar sem föt eru þurrkuð.

„Hefur þú gripið til einhverra ráðstafana til að halda áfram vinnslunni? við erum líklega búin að leigja hús í nágrenninu og færum okkur þangað á meðan það er verið að vinna þetta upp á nýtt, en við þrufum að breyta ferlinu við þurrkum ekkert eða klárum ekki að þurrka fisk hérna á næstu mánuðum, það er mikið verk framundan," segir Magnús að lokum.