Vill að tónlistarmenn fái ívilnanir

Kvikmyndaframleiðendur eiga möguleika á því að fá ívilnanir ef þeir framleiða kvikmyndir á Íslandi. Þingmaður Framsóknarflokksins, Eygló Harðardóttir, vill sjá sambærilegar ívilnanir í tónlistargeiranum og laða þannig poppstjörnur til landsins.

Íslenska ríkið endurgreiðir 20% af framleiðslukostnaði kvikmynda sem gerðar eru á Íslandi. Nú hefur þingmaðurinn Eygló Harðardóttir lagt fram frumvarp á Alþingi þar sem lagt er til að sömu reglur gildi um tónlistarmenn.

Frumvarp Eyglóar miðar að þeim sem taka upp tónlist eða tónlistarmyndbönd hérlendis. Lagt er til að þeir fái 20% endurgreiðslu á kostnaði við upptökurnar, rétt eins og kvikmyndagerðarmenn.

„Við höfum séð hverju þetta hefur skilað í kvikmyndaiðnaði og ég tel að það séu sömu, ef ekki fleiri tækifæri, í tónlistariðnaði," segir Eygló í útvarpsþættinum Reykjavík Síðdegis á Bylgjunni í dag.

Ef frumvarpið verður samþykkt munu íslenskir tónlistamenn njóta góðs af því auk þess sem erlendir tónlistamenn gætu jafnvel hugsað sér að koma til landsins til að vinna að tónlist sinni. Þannig miðar frumvarpið að því að nýta þá þekkingu og þann tækjabúnað sem er til staðar hér á landi í tónlistariðnaði.

„Ég vil fá sem flesta tónlistarmenn til landsins. Og ég vil líka styðja við nýsköpun í íslenska tónlistargeiranum eins og hægt er," sagði Eygló í útvarpsþættinum Reykjavík Síðdegis í dag.

Eygló telur mikilvægt að hlúa að tónlistariðnaðinum. „Þarna er að verða til raunveruleg atvinnugrein. Við verðum að fara að breyta viðhorfi okkar. Þetta er ekki hobbí. Þetta er ekki bara skemmtun, eins og við sem getum ekki haldið lagi upplifum þetta dagsdaglega. Þetta er raunveruleg atvinnugrein," sagði Eygló.