Treysta á veðurguðina

„Ég verð nú að viðurkenna að veðrið er búið að vera helst til skrautlegt þarna fyrir norðan og því gæti allt farið í tóma vitleysu," segir Þóra Sigurðardóttir en hún og eiginmaður hennar, Völundur Snær, eru þessa dagana á fullu að undirbúa jólahlaðborð í hinu fornfræga félagsheimili Ýdölum í Aðaldal.

„Ef það verður allt vitlaust og enginn kemst heim þá held ég að þetta verði besti staðurinn til að verða veðurtepptur á. Barinn verður allavega opinn, nóg af mat og rífandi stemning, svoldið eins og á sveitaböllunum í gamla daga."

Þóra segir hugmyndina að jólahlaðborðunum hafa kviknað í sumar þegar þau hjónin ráku veitingastaðinn Pallinn á Húsavík. „Völli er að norðan og æskuheimili hans stendur nánast við Ýdali þar sem mörg af ógurlegustu sveitaböllum Íslandssögunnar voru haldin hér áður fyrr. Við ákváðum að vera með hlaðborð fyrstu tvær helgarnar í desember þrátt fyrir að veður geti verið vond á þessum slóðum. Hvort að veðurguðirnir verði í stuði verður svo bara að koma í ljós," segir Þóra.

„Við höfum líka fengið til liðs við okkur hóp listamanna af svæðinu, bæði kóra og hljómsveitir. Ég held að það ætti engum að leiðast með svoleiðis skemmtidagskrá, spurning samt hvort fólk tekur með sér tannbursta og svefnpoka, bara til öryggis," segir Þóra að lokum.

Facebooksíða jólahlaðborðsins

Pallurinn.is