Handsmíðaður kajak settur á flot í Reykjavíkurtjörn

Forláta kajak, handsmíðaður frá grunni, var sjósettur í Reykjavíkurtjörn fyrr í kvöld við mikinn fögnuð vegfarenda.

Það er fjölgreinastarf Lindakirkju sem stendur að verkefninu en það er félagsskapur ungra pilta sem njóta þess að vinna að sérstökum og óhefðbundnum verkefnum.

Sveinn Alfreðsson er annar skipuleggjenda verkefnisins. Hann segir meginmarkmið verkefnisins vera að skipuleggja spennandi verkefni fyrir unga drengi.

„Við vildum mæta þessum krökkum," sagði Sveinn í samtali við Vísi. „Þessir piltar eru alveg frábærir, afar handlagnir og margt til listanna lagt."

Fyrir nokkru var ákveðið að leggjast í smíði á kajak. Reyndir handverksmenn veittu piltunum dyggan stuðning enda þurfti sérfræðing til að sýna þeim hvernig réttast væri að vinna með trefjaplastið.

Stóra stundin rann síðan upp í kvöld. Liðsmenn fjölgreinastarfsins burðuðust þá með kajakinn í rigningunni að Reykjavíkurtjörn. Báturinn var settur á flot og piltarnir sigldu á tjörninni. Sveinn segir uppátækið hafa vakið mikla lukku meðal vegfarenda.

„Strákarnir voru afar ánægðir með þetta," segir Sveinn. „Það er mikill hugur í þessum strákum. Síðan stóðu þeir sig mjög vel í róðrinum."

Sjósetningin í dag markar þó ekki endalok fjölgreinastarfsins, því fer fjarri.

„Við söfnum nú í ferðasjóð og stefnan er tekin á Danmörk. Þetta verður mikil ævintýraferð, ætlum að heimsækja Tívolíið og Lególand."

Næsta verkefni á dagskrá er síðan að rafsjóða flugeldastanda fyrir áramótin. Þar á eftir verður Lindakirkja sjálf endursköpuð úr piparkökudeigi.