Lokabardaginn háður

Twilight-myndaflokkunum lýkur með frumsýningu Breaking Dawn Part 2 annað kvöld. Myndin skartar Kristen Stewart og Robert Pattinson í aðalhlutverkum.

Fimmta og síðasta kvikmyndin í Twilight-kvikmyndaröðinni verður heimsfrumsýnd hér á landi annað kvöld. Líkt og fyrri kvikmyndirnar í Twilight-röðinni fjallar Breaking Dawn Part 2 um líf og ástir stúlkunnar Bellu Swan og vampírunnar Edward Cullen.

Parið er nú gift og á saman barn, dótturina Renesmee, auk þess sem Bella er orðin að vampíru. Þegar Irina, sem er meðlimur Denali-fjölskyldunnar, segir Renesmee vera dauðlegt barn sem breytt hafi verið í vampíru verður uppi fótur og fit innan vampírusamfélagsins. Í kjölfarið neyðast Bella og Edward til að verja líf sitt og Renesmee og fá vini sína til að berjast sér við hlið.

Með hlutverk Bellu og Edwards fara Kristen Stewart og Robert Pattinson og með hlutverk Renesmee fer hin unga Mackenzie Foy. Leikararnir Kellan Lutz, Ashley Greene, Peter Facinelli og Elizabeth Reaser bregða sér aftur í hlutverk Cullen-fjölskyldumeðlima og Taylor Lautner fer enn á ný með hlutverk varúlfsins Jacobs Black.

Leikstjóri myndarinnar er Bill Condon en sá hefur einnig leikstýrt kvikmyndunum Chicago, Kinsey og Dreamgirls sem skartaði söngkonunum Beyoncé Knowles og Jennifer Hudson í aðalhlutverkum.

Myndin verður frumsýnd sama dag á Íslandi og Bandaríkjunum og því liggja ekki fyrir dómar um myndina. Næsta víst er að aðdáendur Twilight-kvikmyndanna munu flykkjast á Breaking Dawn Part 2 óháð gagnrýnisröddum enda hefur myndarinnar verið beðið með mikilli eftirvæntingu.

Fyrri hluti Breaking Dawn fékk heldur slaka dóma og hlaut aðeins 25 prósent í einkunn á vefsíðunni Rottentomatoes.com.