Coleman segir Schwarzenegger ekki eiga séns í sig

"Ég er alveg jafn sterkur og ég lít út fyrir að vera, jafnvel sterkari. Þú getur séð það á Youtube," segir vaxtarræktarmeistarinn Ronnie Coleman kíminn en hann er staddur hér á landi um þessar mundir.

Coleman er áttfaldur heimsmeistari í vaxtarrækt og næstfrægasti vaxtarræktarmaður heims, á eftir sjálfum Arnold Schwarzenegger. "Schwarzenegger á ekki séns í mig, ekki nokkurn séns. Ég er búinn að slá öll metin hans," segir hann og hlær. Hann segist eyða um klukkustund í líkamsræktinni á hverjum degi, fimm daga vikunnar. Hann segir það þó ekki vera allt sem þurfi til að ná þessum árangri.

"Ég er búinn að vera að í 36 ár svo ég á ágætlega mikið inni," segir hann og hlær. Hann segist ferðast mikið sökum vinnu sinnar og heldur til að mynda til Malasíu þegar hann hefur lokið veru sinni á Íslandi. Þaðan fer hann til Taílands, svo Singapúr og því næst til Indónesíu. Hann segir þetta líferni þó ekki jafn spennandi og það hljómi. "Þetta er allt vinna og ég fæ aldrei tækifæri til að skoða mig um eða kynnast landinu sem ég er að heimsækja. Svo ferðast ég líka alltaf einn," segir hann.

Coleman tekur þátt í Expó 2012 sem fer fram í Íþróttamiðstöðinni á Varmá um helgina. "Ég ætla að gefa eiginhandaráritanir og ýmis ráð, sitja fyrir á myndum og fleira skemmtilegt," segir hann en auk hans mæta þangað vaxtarræktardrottningarnar Ingrid Romero og Larissa Reis.

- trs